Мен мусиқани сўзлари билан севадиган одамман. Шу боис фақат ўзим тушунадиган тиллардагина қўшиқ эшита оламан. Охирги вақтларда қулоқларим учун янгилик излаб, Yandex Music`нинг нотаниш тўлқинида Златенциянинг «Курьер» деб номланган мусиқий асарига дуч келдим. Қўшиқ шу қадар ёқиб қолганидан уни 20 мартадан кўпроқ қайта эшитдим. Кейин ижодкорнинг бошқа ижодий ишларини тинглаш учун профилига кирдим. Негадир қўшиқларда овозлар турлича ва жонсиз туйилди. Шу сабаб муаллиф ҳақида маълумот қидиришга тушдим.

Google орқали бу тахаллусдан украин шоираси Злата Драч фойдаланишини билиб олдим. Аммо қўшиқдаги овоз эркак кишиники эди. Златанинг Instagram саҳифасига кириб, турли мусиқали видеолар жойланганини кўрдим. Мухлислар шоирадан ижро кимники эканини сўрашганда, у буларни сунъий интеллект ижро қилганини ёзиб қолдирган. Биттагина мусиқани деб бир кунда ўзимга шунча янгиликларни кашф қилдим. Бу тавсияни ўқиётган ҳар бир одамга Златенциянинг «Курьер» қўшиғини тинглашни маслаҳат бераман. Уни эшита туриб, қўшиқни СИ ижро қилган деб ўйламаслигингиз турган гап!

Бу икки ижодкорнинг ўзига хос мусиқий услубларининг уйғунлиги қўшиқни янада жозибадор қилган. Гаганинг драматизми ва Марснинг жонли ритмлари бу асарга алоҳида ҳиссиёт бағишлайди, ўйлашимча. Дуэтнинг асосий мавзуси «carpe diem» — ҳар кунни охиргисидек яшаб ўтказиш ғоясига асосланган бўлиб, инсонларни умрни қадрлашга, унинг ҳар бир лаҳзасида яшашга ундайди. Инсоннинг қийинчиликлар орқали кучли бўлиши ҳақида ҳам сўзлайди. Қишда кўпчилик стрессга тушиб қолишини эшитганман, бу қўшиқни шунинг учун ҳам тавсия қиламан)

Классик рус-поп жанридаги, «old-school» руҳиятидаги мусиқа. Оҳанг, мусиқа ва сўз уйғунликда ажойиб руҳият бера олади. Бу, айниқса, куз-қиш мавсумида инсонда кечадиган ўйчанлик ҳолатига ҳам мос келади.

Йил якунида кино, китоб ва подкастлар қаторида қўшиқлар тавсияси бўйича ҳам материаллар тайёрлашимиз аниқ бўлганида бу йилги релизлардан Дуа Липа ва Элтон Жоннинг «Cold heart»и ёки Imagine Dragons`нинг «Eyes closed»ини, жа бўлмаса The Weeknd`дан тавсия қиларман деб ўйлагандим. «Киз лейла»ни Сена Гул ижросида эшитганимдан кейин эса фикрим ўзгарди. Оддий қўшиқдан кўпроқ бўлгани учун бошқалар билан ҳам бўлишгим келди.

BabaLayka номли YouTube канали Saygi1 номли янги лойиҳа бошлаганига кўп бўлмади. Ҳар бир сони у ёки бу юлдузга бағишланадиган ушбу лойиҳада бошқа юлдузлар ўша санъаткорнинг репертуаридаги қўшиқларни ўз талқинида куйлайди. Биринчиси энг яхши турк реперларидан бири бўлган Ceza`га бағишланган. Saygi1`нинг навбатдаги сони Eurovison-2003 ғолиби Сертаб Эренерга аталди. Унда Paptircem тахаллуси билан ижод қилувчи Сена Гул, Эренернинг Сезен Аксу билан биргаликда қиз болаларнинг турмушига қарши мужодала мақсадида тақдим қилган «Киз лейла» қўшиғини ижро қилди.

Ўзига хос вокал, ажойиб мусиқа ва ҳужайраларгача таъсир қиладиган кучли матндан иборат ушбу санъат намунаси, илгари сурилган ғояга алоҳида тўхталишга ҳожат йўқ – уни эшитиш ва ҳис қилиш етарли. Қиз фарзандлар, уларнинг тақдирига бефарқ бўлмаган ҳамма-ҳаммага ушбу қўшиқнинг оригинал вариантини клипи билан бирга кўриб юборишни ҳам тавсия қилган бўлардим.

Уруш бошланганидан кейин Россияни кўплаб истеъдодлар, илм вакиллари, муҳим мутахассислар тарк этди. Монеточка ҳам шулардан бири. «Хорижий агент» сифат белгисини олган санъаткор ватанидан кетишга мажбур бўлган кўплаб бошқа ҳамюртлари каби уруш инсонлар ҳаётини қанчалик ёмонлаштираётгани, яқинидан айираётгани, ўлдираётгани, қотилга айлантираётгани ҳақида гапириб, куйлаб келмоқда.

2024 йилда у ўзининг «Молитвы. Анекдоты. Тосты» альбомини тақдим этди. Альбомдан менга энг ёққан трек «Это было в России» қўшиғи бўлди. Шунингдек, бу санъаткорнинг «Гори» ва «Переживу» деб аталган қўшиқларини ҳам тинглаб кўришни тавсия қилган бўлардим.

Тавсия

Мен учун 2024 йилнинг энг гўзал асари. Девид Гилмор сочлари оқариб, ёши 80 га етиб қолганда ҳам жаннатий мусиқалар яратмоқда. Бу сафар у бизга истеъдодли қизи Романини таништирди, унинг майин ва покиза овозини эшитиб, Гилморлар ҳали кўп яшар экан, деб қўйдим. Мусиқа ёқса, тўлиқ албом (Luck and Strange) ва Гилморнинг Pink Floyd гуруҳи ижоди билан ҳам танишишни тавсия қиламан. Айтганча, бу — рок.

Йилнинг энг шов-шувли воқеаларидан бири, шубҳасиз, Linkin Park гуруҳининг 7 йиллик танаффусдан сўнг кутилмаганда саҳнага қайтгани бўлди. Бу гуруҳ ҳақида китоб ёзишим мумкин. Тарихдаги энг зўр фронтменлардан бирини йўқотган йигитлар у қолдириб кетган (гуруҳдаги ва мухлислар қалбидаги) бўшлиқни муваффақиятли тўлдиришни эплади. Эмили Армстронг овозида мен Linkin Park`ни ҳис қила олдим, у ҳали ҳам энергияга тўла, агрессив, динамик, муҳими эмоционал. Кўпчилик қатори Честер Беннингтон менинг ҳам қаҳрамоним бўлган, аммо уни асраб, гуруҳнинг кейинги ижодини ҳам қўллаш мумкин. Мен тавсия қилаётган қўшиқ янги Linkin Park қандай эканини кўрсатади. Уни яхшироқ ҳис этиш учун эса, албатта, From Zero албомини эшитиш керак.

Бу қўшиқ «Овоз» лойиҳасида иштирок этган Мадинабону Одилова томонидан куйланган. Оҳанг тингловчини ўзига тортади. Унинг асл талқинини Озодбек Назарбеков айтганига қарамай, 2024 йилда танлов учун қайта куйланган қўшиқ мен учун онг остида биринчи шаклланиб бўлди. Ажойиб ижро учун Мадинабону ва Бобур ғазалини 8 йил аввал куйга солган Маданият вазири Озодбек Назарбековга раҳмат.

Декабрь бошида Эронда ҳижобсиз жонли эфирда қўшиқ айтиши ортидан ҳибсга олинган ва дунё матбуотида кенг муҳокамаларга сабаб бўлаётган таниқли хонанда Парасту Аҳмадийнинг «Kamar barik» номли қўшиғини мириқиб тинглаяпман. У жонли эфирда жами еттита таронани ижро қилган. Парастунинг нафақат овози, балки саҳнада ўзини тутиш маданияти ҳамда созандалар ижоди ҳам қўшиқларни маромига етказиб куйлашда муҳим ўрин тутган. «Kamar barik» таронасида хонанданинг нолалари ва гитаристнинг завқ билан гитара чалиб, ҳамоҳангликни ярата олганлиги каминага жуда ёқди. Парасту Аҳмадийнинг ижод намуналарини барча қўшиқсеварларга тинглаб кўришни тавсия этаман!